Er hat nix aundas net im Kopf als wia seine Biachln, seine sewagschriebanan Biachln. Tag und Nacht denkta aun nix aundas net als wia aun seine Biachln, da Fraunz. Is a Biachl fertig, denkta schau wieda auns nexte. Bei eam reissts net ab mit de Biachln.

Natirlich is´ sche, waun wer sovül Biachln schreibt, awa hi und da fragta si schau, da Fraunz, ob des nu normal is, waun ma nix aundas net im Kopf hat als wia seine Biachln. Warum tua i ma des au, fragta si hi und da. Schließlich is des Biachaschreim ja gaunz a schene Arbeit.

Zeascht amal muaß da was Gscheits eifalln. Daun muaßtas aufschreim, und des kau si gaunz sche laung dahiziang. Und daun muaßt nu wen finden, der was da  des gaunze druckt. Nau und zletzt muaßt a nu dazuaschaun, dass de Biachln unta d`Leit kuman.

Also gaunz a schene Arbeit, was da zaumkumt. Awa des kau in Fraunz net abschreckn, er schreibt a Biachl nachn aundan und hat des Gfühl, des is sei Lebn. Do hi und da fragta si, ob des wirkli sei Lebn is. Was kumt net ois z´kurz, denkta si. Wia gern tata a bissl waundan. Oda wia gern foarada irgndwohi, nach Italien zum Beispül oda nach Fraunkreich, vielleicht a nach Afrika. Awa leida, fia sowas hata ka Zeit net, da Fraunz, seine Biachln san eam wichtiga.

A klavierspüln tata gern oda singa, vielleicht a schifoan im Winta oda a bissl schwimma im Summa. Fia des ois hata ka Zeit net, da Fraunz.

Is des vielleicht a Kraunkheit, des Biachlschreim, hata schau üwalegt. Oda vielleicht a a Sucht, so wia Drogn vielleicht. Schließlich kaua net sei ohne schreim, und eam fehlt direkt was, wauna net jedn Tag wenigstns a paar Seitn gschriebn hat.

Solla vielleicht zu an Dokta geh, oda zu an Psychologn weng seina Schreibarei. Oda is vielleicht des Schreim fia eam sogar sowas wia a Therapie, hata a schau üwalegt, da Fraunz. Neta was therapierta mit sein Schreim? Wülla in Tod va da Schaufi springa mit sein Schreim?  Sozusagn unsterblich wean mit seine Biachln? Weun ja schließlich seine Biachln vielleicht amal üwalem. Awa was hülft des ois, denkt si da Fraunz, wauna mit seina gaunzn Schreibarei vielleicht aunan Lebn vabeigeht und z`letzt sang muaß: Ja, i hab an Haufn Biachln gschriebn, awa glebt, so richtig glebt hab i eigantlich net.

So schwoaze Gedaunkn hata hi und da, da Fraunz, und daun isa oft gaunz traurig und üwalegt, ob des richtig und guat is, wasa da tuat, des vüle Schreim. Und er is si daun gar nimma so sicha, bisa wieda a neiche Idee hat, sein Grüffi nimmt und drauflosschreibt und nimma aufheat zum Schreim, bis wieda a Biachl fertig is, und oille de schwoazn Gedaunkn und Zweufin vaflong san.

Es is schau a wengl gspaßig mitn Fraunz und seina Schreibarei. Amal hü, amal hot, und oiweu wieda geht da Pegasus durch mit eam, – oiweu wieda.