Luftobschneida

Mid an ruck wiad a munta wäu da wogn woascheinli iba oan stoa grumpüt is. Ea reissd de augn auf – do segn tuad a nix, es gibt koa liacht, es riacht greisli noch zvü leid und hoas is aa do herin.
Ea greift mid seina haund vuasichti auf d’seitn und suacht nochn vodan sein ärmü, seina haund. Da voda ziagt an buam glei zuwi zu eam und streichüt iba seine hoa, de scho gaunz vaschwitzt san.

„Voda, woastas wo mia scho san?“

„Na, bua, mia kinnan niagends aussi schau, do san koane fensta herin, oba duat gaunz vuan warat a gaunz kloana spoit, oba i kumm ned hi, wäu do miassat i iba sovü leid kräun.“

Da bua is stad und spekuliat a zeidl. „voda, wia laung weama nu foan, wäu i hedad scho so an duascht?“

„bua, i woasas wiakli ned, hob nu a weng geduid, wäu iagendwaun miassns midn transpoata steh bleim, wäu iagendwaun wean ålle an duascht haum.“

„i vaschteh des oisi ned, i hob ja gsegn, wia du dem maun, dea vuan neman schafför sitzt, a haufn göd gem host. Wiaso miassn mia in so an stingadn kobü sei, ohne tringa und ohne liacht?“

„jo mei, sama froh das mia no lem und mia hoffentli wohi kemman, wos ned auf uns schiassnd und koane granodn auf uns fliagn, wo‘s a guads wossa gibt und wos z’essn. Hostas eh gsegn, das bei uns dahoam oisi hi is, do gibt’s nix mea, koa saubas wossa, de heisa san zschossn, koa stoa steht auf an aundan. Geh druck di hea zu mia und schlof nu a wenig, wäu waunst wieda aufwochst do samma vielleicht scho am zü.“

Da bua druckt si zum vodan zuwi und denkt si hoam, an oi de schen büda in sein kopf, waun im frialing oisi bliad hod; aun den gruch vom moakt – so bunt – und ea mit da  muatta gmias und kreitl ghoid hod; dahoam, d’muatta beim kocha, wia des grochn und ea si mid seine gschwista aufs essn gfreid hod.

Oba de san ålle nimma do, nua da voda und ea san üba bliem und iaz wiad eam gaunz schwa ums heaz waun ea drau denkt oda is wei eam auf oamoi des schnaufn so schwa foid und ea fost koa luft mea kriagt? Ea wü des dem voda sogn und ibahaupt wü ea eam no sovü frogn, do ea bringt koa woat fira.

Ea head, wia d‘leid aufangan zan schrei und wias an d‘waund vom auto schlogn. Oba da lärm wiad oiwei leisa, ea schnauft und schnauft, oba es is koa luft mea do.